}

هەر خێزانێكی ئاوارە بگەڕێتەوە پارەی پێدەدرێت

کوردستان 06:00 PM - 2021-11-28

وەزارەتی كۆچ و كۆچبەرانی عیراق بڕێك پارەی بەسەر ژمارەیەك خێزانی ئاوارەی لەكەمپەكانی پارێزگای سلێمانی دابەشدەكات بەمەبەستی هاندانیان تا بەشێوەیەكی ئارەزوومەندانە بگەرێنەوە ناوچەكانی خۆیان. 
لەو بارەیەوە، عەلی عەباس جیهاكیر بەڕێوەبەری گشتی فەرمانگەی كاروباری لقەكان لەوەزارەتی كۆچ و كۆچبەران لەمیانی بڵاكراوەیەكدا كەوێنەیەكی دەست PUKmedia كەوتووە، رایگەیاند: گوژمەی یەكەمی ئەو بڕە پارەیەی كە لەلایەن دیوانی وەقفی سوننییەوە تەرخان كرابوو بەسەر هەموو خێزانێكی ئاوارە لەكەمپەكانی پارێزگای سلێمانی دابەشكران كە خوازیاری گەڕانەوەن بۆ ناوچەكانیان و بڕی پارەكەش بۆ هەر خێزانێك 500 هەزار دینارە.
جیهاكیر راشیگەیاند: ژمارەی ئەو خێزانانەی بڕی ئەو هاوكارییە داراییە دەیانگرێتەوە بریتی بووە لە 545 خێزان، ئەوەش بەئامانجی هاندانیان تاوەكو بەشێوەیەكی ئارەزوومەندانە بۆ پارێزگاكانی خۆیان بگەڕێنەوە، ئاماژەی بەوەشدا لەكارەكانیان بەردەوامن تاوەكو هاوكارییەكە بگەیەننە سەرجەم ئەو خێزانە ئاوارانەی كە لەلای وەزارەتی كۆچ وكۆچبەران تۆماركراون.
جێی ئاماژەیە پێشتر دیوانی وەقفی سوننی بەهاوكاری لەگەڵ وەزارەتی كۆچ دەستپێشخەرییەكیان راگەیاند بەمەبەستی هاندانی ئەو خێزانە ئاوارانەی كەتا ئێستا لەكەمپەكاندان تاوەكو بەشێوەیەكی ئارەزوومەندانە بۆ ناوچەكانی خۆیان بگەڕێنەوە لەبەرامبەردا هەموو خێزانێك بڕی یەك ملیۆن دیناریان پێدەدرێت.
هەر دوێنێ‌ وەزارەتی كۆچ و كۆچبەران خەرجكردنی بڕی 500 هەزار دیناری بەسەر هەموو خێزانێكی ئاوارە لەپارێزگای سلێمانی راگەیاندبوو، ئاماژەی بەوەشدابوو تاوەكو ئێستاش گەڕانەوەی ئاوارەكان ئارەزوومەندانەیە.
هەینی رابردووش وەزیری كۆچ و كۆچبەران بەمەبەستی لەنزیكەوە ئاگاداربوون لەڕەوشی ئاوارەكان بەتایبەتیش لەم كاتەدا بەهۆی هاتنی وەرزی زستانەوە سەردانی كەمپی ئاشتی لەپارێزگای سلێمانی كردبوو.
لەبارەی سەردانەكەشەوە، عەلی عەباس وتەبێژی وەزارەتی كۆچ تایبەت بە PUKmediaی راگەیاند: مەبەست لەسەردانەكە بۆ ئاگاداربوونە لەرەوشی ئاوارەكان و گەڕانەوەیان بەشێوەیەكی ئارەزوومەندانە بۆ ناوچەكانی خۆیان بە دەستپێشخەری  دیوانی وەقفی سوننی، روونیشیكردەوە، تەنها لەهەرێمی كوردستان ئەو كەمپانە ماون.
راشیگەیاند: بۆ هەموو خێزانێكی ئاوارە كە دەیانەوێت بەشێوەیەكی ئارەزوومەندانە بگەڕێنەوە ناوچەكانیان بڕی 500 هەزار دیناریان دەدرێتی و كاتێكیش دەگەڕێنەوە 500 هەزار دیناری تریان دەدرێتێ‌، ئاماژەی بەوەشدا دەستپێشخەرییەكە ئارەزوومەندانەیەو مەبەستیشیان بووە بەدواداچوون بۆ  رێگرییەكانی گەڕانەوەیان بكەن و چارەسەری بەشێك لەو كێشانەیان بكەن كە ئاوارەكان لەناوچەكانی خۆیاندا هەیانەو بتوانن بگەڕێنەوە. 
جەختیشی كردەوە، بەرنامەی پشتیوانیكردن لەكەمپەكان بەزۆر نییەو ئارەزوومەندانەیە بەڵام خۆ ناكرێت وەزارەت بۆ ماوەیەكی زۆر ئاوا بمێنێتەوە، بڕیار لەبارەیانەوە دەردەكرێت و بژاردەش دەدرێتە دەست خۆیان كەئاخۆ دەگەڕێنەوە یاخود چارەسەری رەوشەكانیان بكرێت، چونكە ناكرێت دۆخەكە بەو شێوەیەی ئێستا بمێنێتەوە، ئاماژەی بەوەشدا پارێزگاری سلێمانی بەوەفدەكەی راگەیاندووەو جەختیكردۆتەوە كە ئاوارەكان میوانی پارێزگاكەن و لەڕووی مۆڕاڵییەوە ناتوانن ئاوارەكان ناچار بكەن بگەڕێنەوە بۆ ناوچەكانیان.
PUKmedia تایبەت

 

ئەمانەش ببینە

زۆرترین خوێنراو

هەواڵەکان دەنێرین بۆ مۆبایلەکانتان

ئەپڵیکەیشنی

دابەزێنە

The News In Your Pocket